„მინდა, კიდევ ერთხელ, მადლობა გადავუხადო სერბეთის პარლამენტის თავმჯდომარეს და უკრაინის პარლამენტის თავმჯდომარეს, რომლებიც იყვნენ ამ შეხვედრის ინიციატორები, ზოგადად, ახალი და უნიკალური ფორმატისა, სადაც ევროკავშირის წევრობის კანდიდატი ქვეყნების პარლამენტების თავმჯდომარეებს გვექნება შესაძლებლობა, ერთმანეთთან გვქონდეს კონტაქტი იმ მიღწევებსა თუ გამოწვევებთან დაკავშირებით, რომელიც ევროკავშირში გაწევრიანების გზაზე იქმნება“, – განუცხადა სერბეთში ქართველ ჟურნალისტებს საქართველოს პარლამენტის თავმჯდომარე შალვა პაპუაშვილმა.
„დღეს ბელგრადის დეკლარაციით დავაფუძნეთ ეს ფორმატი. ასევე, გადავწყვიტეთ, რომ ეს იქნება მუდმივი ფორმატი, რომელიც პარლამენტის თავმჯდომარეების დონეზე ყოველ წელს შეიკრიბება. ამავე დროს, შეკრებებს შორის ჩვენ გვექნება როგორც პარლამენტის თავმჯდომარეების დონეზე მუდმივი კონტაქტი და კომუნიკაცია, ისე სხვადასხვა საპარლამენტო ფორმატის გამოყენებით.
ყველა ვთანხმდებით იმაზე, რომ საჭიროა ერთი ხმით საუბარი ბრიუსელთან – მაშინ, როდესაც მიდის სხვადასხვა ოფციებსა თუ ვარიანტებზე ფიქრი ევროკავშირის შიგნით, თუ როგორ მოხდეს ახალი წევრების მიღება თუ არმიღება, იყოს ეს სრული წევრობა, ნახევარწევრობა, არაწევრობა და არასრულფასოვანი წევრობა, მეორეხარისხოვანი წევრობა… ვხედავთ, რომ ყველანაირი ვარიანტი გვესმის. მნიშვნელოვანია, რომ კანდიდატმა ქვეყნებმაც საკუთარი სიტყვა თქვან. ჩვენ არ უნდა ვიყოთ მხოლოდ ობიექტები გაფართოების; ჩვენ უნდა ვიყოთ ამ გაფართოების პროცესის მონაწილენი, ევროკავშირის მომავლის თანაშემოქმედები მისი შინაარსით, ფორმითა და პროცედურების გათვალისწინებით. ასე რომ, ეს ერთსულოვნება დღეს ყველა კანდიდატი ქვეყნის პარლამენტის თავმჯდომარესა და წარმომადგენელს შორის იყო. გვიხარია, რომ ჩვენ, ამ მხრივ, თანამოაზრეები ვართ“, – აღნიშნა შალვა პაპუაშვილმა.
