„IRI და NDI წლების განმავლობაში აყალბებდნენ რეიტინგებს. ახლა გამოჩნდა, რომ ამ კოლექტიურ „ნაცმოძრაობას“ ჯამში აქვთ 16%, ხოლო მმართველ პარტიას — 36%. ანუ, ალოკაციით მთავრობის რეიტინგი მინიმუმ 65-70%-ია. შესაბამისად, ის რეიტინგები, რაც გამოქვეყნდა, ზუსტად ერთში ერთია იმასთან, თუ რა განწყობებიცაა საზოგადოებაში“, – ამის შესახებ საპარლამენტო უმრავლესობის წევრმა, ირაკლი ზარქუამ IRI-ს კვლევაზე საუბრისას განაცხადა.
„IRI და NDI არის კვლევითი ორგანიზაციები, რომლებიც მთელი ამ წლების განმავლობაში პროსახელისუფლებო რეიტინგებს არასდროს წერდნენ – პირდაპირ წერდნენ ოპოზიციის რეიტინგებს და აყალბებდნენ და აყალბებდნენ. ახლა გამოჩნდა, რომ ოპოზიციას დაუკვეთავს IRI-სთვის კვლევა – განწყობები და რეიტინგები პარტიების საქართველოში – და აღმოჩნდა, რომ ამ კოლექტიურ „ნაცმოძრაობას“ („ნაცები“, „გირჩები“, გახარია და დამატებული კიდევ სხვები) ჯამში აქვთ 16%, ხოლო მმართველ პარტიას – 36%. ანუ, ალოკაციით ეს მინიმუმ იმას ნიშნავს, რომ საქართველოს მმართველ პარტიას დაახლოებით 65-70% რეიტინგი აქვს. ამას ცოცხალი თავით არ ამბობენ და მალავენ.
მეორე დასტური იმისა, რომ ეს რეალობაა: დააანონსეს აქცია პარკში: „ჩვენი ბელადი დავიხსნათო, შევიკრიბოთო“. გუშინ შეიკრიბდნენ და დაახლოებით 57 კაცი გამოვიდა. შესაბამისად, ის რეიტინგები, რაც გამოქვეყნდა, ზუსტად ერთში ერთია იმასთან, თუ რა განწყობებიცაა საზოგადოებაში“, – განაცხადა ირაკლი ზარქუამ.
