ილია ინჯია ევროპის ქალაქებში მიმდინარე პროტესტებზე: „ჩვენ გვეუბნებოდნენ: „თავი დაანებეთ ახალგაზრდებს, დაწვან პარლამენტი, შეუტიონ პრეზიდენტის სასახლეს, ეს ყველაფერი გამოხატვის თავისუფლებააო“, და თავად საფრანგეთში 2000 გამომძიებელი დაიმატეს, 15 ათასამდე ადამიანია დაპატიმრებული, გაამკაცრეს სასჯელებიც. ასე რომ, ის, რასაც საქართველოს ურჩევდნენ და უთითებდნენ, თავადვე ბუმერანგივით შემოუბრუნდათ“

„ჩვენ გვეუბნებოდნენ: „თავი დაანებეთ ახალგაზრდებს, დაწვან პარლამენტი, შეუტიონ პრეზიდენტის სასახლეს, ეს ყველაფერი გამოხატვის თავისუფლებააო“, და თავად საფრანგეთში 2000 გამომძიებელი დაიმატეს, 15 ათასამდე ადამიანია დაპატიმრებული, გაამკაცრეს სასჯელებიც. ასე რომ, ის, რასაც საქართველოს ურჩევდნენ და უთითებდნენ, თავადვე ბუმერანგივით შემოუბრუნდათ“, – ამის შესახებ საქართველოს პარლამენტის ვიცესპიკერმა, „ევროპელი სოციალისტების“ თავმჯდომარემ, ილია ინჯიამ საფრანგეთსა და სხვა ევროპულ ქალაქებში მიმდინარე პროტესტებზე საუბრისას განაცხადა.

„დავიწყოთ ცოტა შორიდან: 2024 წლის მიწურულს რა პროცესებიც ჩვენ ვიხილეთ – როგორ ცდილობდნენ რადიკალური ჯგუფები პარლამენტის შენობის დაწვას, თავს ესხმოდნენ სამართალდამცველებს და ა. შ. – უბრალოდ, კრიმინალები კრიმინალურად იქცეოდნენ. გვახსოვს, მაშინაც გამოდიოდნენ ეს ევრობიუროკრატები და აცხადებდნენ, რომ ეს თურმე თავისუფალი აზრის გამოხატვაა, არ შეიძლება ამ ახალგაზრდების დასჯა, გამოუშვით ციხიდანო და ა. შ.

დღეს ვხედავთ, რომ ის რასაც საქართველოს ურჩევდნენ და უთითებდნენ ბუმერანგივით შემოუბრუნდათ. რა თქმა უნდა, სამწუხაროა და ცუდი სანახავია ევროპაში, როდესაც ამხელა ქალაქებს ასეთ მდგომარეობაში ხედავ – ანგრევენ, ძარცვავენ და ათას კრიმინალურ საქციელს სჩადიან ევროპის შუაგულში, უდიდეს ქალაქებში. ფაქტობრივად, არ დარჩა ევროპის გავლენიანი ქალაქი, სადაც მსგავსი ფაქტების მომსწრენი არ ვიყოთ.

ახლა ამ ევრობიუროკრატების განცხადებები პარტიების აკრძალვის საკითხს ეხება და ჭკუას გვასწავლიან, რომ, თურმე, ეს არ შეიძლება, ეს პარტიები არ უნდა ავკრძალოთ და ეს პროცესი საერთოდ გავაჩეროთ. ესე იგი, ის დანაშაულები, რაც ამ რადიკალურმა ძალებმა ჩაიდინეს, რაც კომისიამ გამოიძია და მის დასკვნაში დევს, არაფერს ნიშნავს – უნდა გადავდოთ, გადავფურცლოთ და დავივიწყოთ, თურმე. თავად კი საფრანგეთში 2000 გამომძიებელი დაიმატეს, 15 ათასამდე ადამიანია დაპატიმრებული და შესაძლოა, კიდევ უფრო მეტი დააკავონ. გაამკაცრეს სასჯელებიც: საუბარია დიდძალ ჯარიმებზე (50 ათას ევრომდე) და 15 წლამდე თავისუფლების აღკვეთაზე. და ესენი ჩვენ გვეუბნებოდნენ: „თავი დაანებეთ, დაწვან პარლამენტი, შეუტიონ პრეზიდენტის სასახლეს, ეს არაფერია, ეს გამოხატვის თავისუფლებაა“ და ა. შ.

ამ შეფასებების შემდეგ, ალბათ, იმ რეალობამდე მივალთ, რომ საფრანგეთსა და ევროპის სხვა ქვეყნებს მოუწევთ იმ კანონების მიღება, რაც ჩვენ მივიღეთ. დარწმუნებული ვარ, იქამდეც მივლენ, რომ დაასანქცირებენ ან აკრძალავენ ამა თუ იმ ორგანიზაციას ევროპაში, რომელიც გარე ქვეყნებიდან ფინანსდება და რომელიც, თურმე, ორგანიზებას უწევდა იმ არეულობებს, რაც იქ ხდებოდა (და ახლაც ხდება, არ დამთავრებულა). ასე რომ, შორს არ არის ის რეალობა, რომ საქართველოს მიერ გავლილი გზის გავლა ევროპასაც მოუწიოს – ანუ მსგავსი საკანონმდებლო და სასამართლო პროცესების ჩატარება დასჭირდეთ თავიანთ ქვეყნებში. ჩვენ იმხელა გამოცდილება მივიღეთ ბოლო წლების განმავლობაში, რომ თუ ამას ევროპა გაიზიარებს, ბევრად გაუადვილდება მტკივნეული პროცესების თავიდან აცილება“, – განაცხადა ილია ინჯიამ.