ზვიად შალამბერიძე ოპოზიციის აქციებზე: „საცოდავი საყურებელია ეს ყველაფერი – ბოლო აქციაზე ათასამდე კაციც ვერ შეკრიბეს, რადგან ქართული საზოგადოება დაიღალა ამათი ტყუილებით, ტყუილი დაპირებებითა და სოციალური ქსელებიდან საუბრით. რამდენჯერ შეიძლება ადამიანი ენდოს იმას, ვინც თავიდან ბოლომდე თავისი პირადი ინტერესების გამტარებელია და საერთოდ არ აინტერესებს საზოგადოება?!“
„საცოდავი საყურებელია ეს ყველაფერი – ბოლო აქციაზე ათასამდე კაციც ვერ შეკრიბეს, რადგან ქართული საზოგადოება დაიღალა ამათი ტყუილებით, ტყუილი დაპირებებითა და სოციალური ქსელებიდან საუბრით. რამდენჯერ შეიძლება ადამიანი ენდოს იმას, ვინც თავიდან ბოლომდე თავისი პირადი ინტერესების გამტარებელია და საერთოდ არ აინტერესებს საზოგადოება?!“ – ამის შესახებ საპარლამენტო უმრავლესობის წარმომადგენელმა, ზვიად შალამბერიძემ რადიკალური ოპოზიციის მცირერიცხოვან აქციებზე საუბრისას განაცხადა.
„ჩვენ უკვე მერამდენედ ვნახეთ მათ მიერ გამოცხადებული თარიღები, როდესაც აცხადებენ: „ვიკრიბებით“, „ბევრნი უნდა ვიყოთ“, „ჩვენ ვიქნებით ასი ათასნი“ და ა.შ. ვნახეთ მათი ბოლო შეკრება უნივერსიტეტთან – როგორც მახსოვს, დაახლოებით ათასამდე კაცი იყო. ამის შემდეგ კი მათი ლიდერები ამბობდნენ, რომ რაოდენობას მნიშვნელობა არ აქვს, ზოგი ამბობდა – არ მოგვიმზადებია რაოდენობაო, ზოგიც – საკმარისი რაოდენობა იყოო და ა.შ.
ეს ყველაფერი, რასაც ჩვენ ვუყურებთ, ცოტა არ იყოს საცოდავი საყურებელია. რაღაცას ცდილობენ, მაგრამ არ გამოსდით. და იცით, რატომ არ გამოსდით? ქართული საზოგადოება უკვე დაიღალა ამათი სოციალური ქსელით საუბრით, ტყუილით, ტყუილი დაპირებებით. წლებია უკვე, არჩევნებზე ეს ადამიანები ან ჩადიან ამომრჩეველთან, ან არ ჩადიან, ამომრჩეველი კი ძალიან სენსიტიურია. ჩვენც ხომ ვხვდებით ჩვენს ამომრჩეველს – როგორც წინასაარჩევნოდ, ისე ახლაც – და ყოფილა გარკვეული მიმართულებით ხარვეზები ჩვენთანაც. დავუშვათ, რაღაც თემებზე შევპირებივართ მოსახლეობას, რომ მომავალ წელს გავაკეთებდით, მაგრამ ყოფილა ხელისშემშლელი ფაქტორები და ერთ წელიწადში კი არა, ორ წელიწადში გავაკეთეთ. ამას ძალიან სენსიტიურად აღიქვამს შენი ამომრჩეველი, იმიტომ რომ შენ მისთვის ხარ უმაღლესი საკანონმდებლო ორგანოს წევრი, რომელსაც ის აძლევს ლეგიტიმაციას, რომ მისი ხმა წარმოადგინოს პარლამენტში. და როდესაც შენ ამას არ აკეთებ – ერთჯერ არ შეხვედი, ორჯერ არ შეხვედი, მესამედაც მოატყუე – ის ადამიანი ფიქრობს: რა გარანტია მაქვს, რომ მეოთხედაც არ მომატყუებ?
ეს ხდებოდა არა მარტო პარლამენტში შესვლასა და არჩევნებზე, არამედ იმ აქციებზეც, როდესაც ხან ერთ თარიღს ასახელებდნენ, ხან მეორეს: „ამას გავაკეთებთ“, „ამას გადავატრიალებთ“, „ახლა მშვიდობიან რევოლუციას მოვახდენთ“ და ა.შ. ახლა კი ის ადამიანები ხედავენ, რომ ის ლიდერები, რომლებიც „მშვიდობიანი რევოლუციის“ ანუ გადატრიალების სადავეებთან იყვნენ, დღეს თავიანთ ბრალს აღიარებენ და ამბობენ, რომ რეალურად დანაშაული ჩაიდინეს.
აქედან გამომდინარე, რამდენჯერ შეიძლება ადამიანი და საზოგადოება ენდოს იმას, ვინც თავიდან ბოლომდე თავისი პირადი ინტერესების გამტარებელია და საერთოდ არ აინტერესებს საზოგადოება?!“ – განაცხადა ზვიად შალამბერიძემ.
