„შოვის ტრაგედიასთან დაკავშირებით, ჩვენ მოვისმინეთ შვეიცარიელი ექსპერტების დასკვნა, რომელიც ერთი-ერთში ემთხვევა ქართველი ექსპერტების წინასწარ დასკვნას, რაც თვალნათლივ აჩვენებს, რომ, მათ შორის, შოვის ტრაგედია რადიკალური ოპოზიციის მხრიდან გამოყენებულ იქნა პოლიტიკური მანიპულაციებისთვის“, – განაცხადა “ქართული ოცნების” დეპუტატმა, პარლამენტის გარემოს დაცვისა და ბუნებრივი რესურსების კომიტეტის თავმჯდომარემ მაია ბითაძემ.
ბითაძის თქმით, შვეიცარიელი ექსპერტების დასკვნით კიდევ ერთხელ დადასტურდა, რომ ერთად გააქტიურებულ ხუთ სტიქიურ მოვლენას ვერანაირი განგაშის სისტემა თავიდან ვერ აგვაცილებდა.
“ჯერჯერობით, მსოფლიოში არ გამოგონილა იმგვარი განგაშისა და პრევენციის მეთოდოლოგია, რომელიც კლიმატის ცვლილებიდან გამომდინარე, სწრაფად დინამიკაში მოყვანილ ხუთ სტიქიურ მოვლენას ააცილებს მსოფლიოს რომელიმე ქვეყანას. შესაბამისად, ყველა ეს ბინძური ტყუილი, რომელიც მუდმივად ისმის – ცილისწამება, სიცრუის ტირაჟირება ჩვენი ოპოზიციისა და ზოგიერთი ვაი-ექსპერტის მხრიდან, მხოლოდ იქით არის მიმართული, რომ ამ ქვეყნის მოსახლეობა დაზაფრონ და მოატყუონ”, – აღნიშნა მაია ბითაძემ.
