მარიამ ქვრივიშვილი: „საქართველოს რკინიგზის ქსელი სრულად ელექტრიფიცირებულია, რაც მყარ საფუძველს ქმნის დაბალი ემისიის მქონე სატვირთო გადაზიდვებისთვის“
„ჩვენ ვაგრძელებთ სარკინიგზო ინფრასტრუქტურის მოდერნიზაციას, გამტარუნარიანობის გაფართოებას და მოძრავი შემადგენლობის განახლებას, რათა მეტად შევუწყოთ ხელი დაბალი ემისიის მქონე სატვირთო ტრანსპორტზე გადასვლას“, – განაცხადა ვიცე-პრემიერმა, ეკონომიკისა და მდგრადი განვითარების მინისტრმა მარიამ ქვრივიშვილმა თურქეთის რესპუბლიკაში, ქალაქ ანტალიაში, გაერო-ს კლიმატის ცვლილების ჩარჩო კონვენციის მხარეთა 31-ე კონფერენციის (COP31) ფარგლებში, მწვანე სატვირთო დერეფნების გლობალური ინიციატივის (GGFCI) შესახებ გამართულ მინისტერიალზე სიტყვით გამოსვლისას.
მარიამ ქვრივიშვილმა სიტყვით გამოსვლისას ქვეყანაში მიმდინარე მსხვილ ინფრასტრუქტურულ პროექტებზეც ისაუბრა და აღნიშნა, რომ საქართველოს რკინიგზის ქსელი სრულად ელექტრიფიცირებულია, რაც მყარ საფუძველს ქმნის დაბალი ემისიის მქონე სატვირთო გადაზიდვებისთვის.
„ჩვენი სარკინიგზო მოდერნიზაციის პროექტით, რომელიც 2025 წელს დასრულდა, მნიშვნელოვნად გაიზარდა გამტარუნარიანობა და საიმედოობა და, ამასთან, ტრანზიტის დრო განახევრდა. მიმდინარე წლის ივნისში ბაქო-თბილისი-ყარსის რკინიგზა სრული დატვირთვით ამოქმედდა და საქართველოს, აზერბაიჯანისა და თურქეთის თანამშრომლობით აზიასა და ევროპას შორის დაკავშირებადობა კიდევ უფრო გააძლიერა“, – აღნიშნა მარიამ ქვრივიშვილმა.
მან ყურადღება ანაკლიის ღრმაწყლოვანი პორტის პროექტზე გაამახვილა და აღნიშნა, რომ ანაკლიის ღრმაწყლოვანი პორტი ერთ-ერთი საკვანძო პროექტია, რომლის ამოქმედებაც 2029 წლისთვის იგეგმება.
„ანაკლია გააძლიერებს რკინიგზისა და ნავსადგურის ინტეგრაციას და თანამედროვე, ენერგოეფექტური საპორტო ოპერაციებისთვის შექმნის შესაძლებლობებს. ჩვენ ასევე ვახორციელებთ საზღვაო გარემოსდაცვით ინიციატივებს, მათ შორისაა „ლურჯი პორტების“ პროექტი და საერთაშორისო საზღვაო ორგანიზაციასთან (IMO) თანამშრომლობა GreenVoyage2050 პროგრამის ფარგლებში“, – განაცხადა მარიამ ქვრივიშვილმა.
