მსოფლიო

ნიკოლ ფაშინიანი: „სომხეთმა ევროკავშირში გაწევრიანების პროცესი დაიწყო, თუმცა მიზნად ნატო-ში გაწევრიანება არ დაუსახავს“

სომხეთის პრემიერ-მინისტრმა ნიკოლ ფაშინიანმა განაცხადა, რომ სომხეთი არ შეუერთდა დუბლინში მიღებულ დეკლარაციას ევროპული უსაფრთხოების ფუნდამენტური პრინციპების შესახებ ნატოსთან დაკავშირებული მრავალრიცხოვანი მითითებების გამო.

ეროვნულ ასამბლეაში სამთავრობო საათის მიმდინარეობისას, პრემიერ-მინისტრმა დეპუტატ ვოლოდი აკოპიანის კითხვას უპასუხა.

აკოპიანი დაინტერესდა, თუ რატომ არ შეუერთდა სომხეთი 12 ნოემბერს, ევროპული პოლიტიკური თანამეგობრობის სამიტის ფარგლებში მიღებულ დოკუმენტს.

ფაშინიანმა აღნიშნა, რომ პარტნიორებს ამ გადაწყვეტილების მიზეზი ღიად წარუდგინა.

„ერთი მიზეზის გამო: პარტნიორებს გამჭვირვალედ ვუთხარი, რომ იქ ნატოსთან დაკავშირებული მითითებების ძალიან დიდი რაოდენობა იყო. ჩვენ ჩვენი პოზიცია გამოვხატეთ, რომ დიახ, ჩვენ დავიწყეთ ევროკავშირში გაწევრიანების პროცესი, მაგრამ ჩვენს პოლიტიკაში არ არის გადაწყვეტილება იმის შესახებ, რომ ვაპირებთ ნატო-ში შესვლას ან ზოგადად ასეთ ამოცანას ვისახავთ“, – განაცხადა პრემიერ-მინისტრმა.

მან დასძინა, რომ დოკუმენტის დანარჩენ ნაწილში მისაღები და მყარი დებულებები იყო.

ფაშინიანის თქმით, მთავრობა ერთმანეთისგან მიჯნავს ევროკავშირში გაწევრიანებისა და სამხედრო-პოლიტიკურ ალიანსში გაწევრიანების საკითხებს.

„ჩვენ ვთქვით: ევროკავშირს – კი, მაგრამ სამხედრო-პოლიტიკური ალიანსის ლოგიკით გატარებულ პოლიტიკას არ ვიღებთ. სწორედ ეს იყო მიზეზი და ამას გაგებით მოეკიდნენ“, – აღნიშნა პრემიერ-მინისტრმა.