„სტატუსი “ელიტარული ძაღლებისა და კატების” ფბ-ჯგუფიდან: “შეიძლება, წითელხიზილალიან ბლინში ჩემი ჩიხუახუასთვის ცოტა კარაქიც რომ დავამატო?” კომენტარი: “ამოწყდით, ნაძირლებო!”
გუშინ დაუმსახურებელი იგნორით ვუპასუხეთ საქართველოს პარლამენტში ჟორჟ ბიზეს ცნობილი ოპერის – “მარგალიტის მაძიებლების” ქავერს, განსაკუთრებით, დეპუტატ ალექსანდრე რაქვიაშვილის მიერ შესრულებული არიის ნაწილში“, – წერს სოციალურ ქსელში „ხალხის ძალის“ წევრი დავით ქართველიშვილი.
„დეპუტატი წუხდა, რომ, კერძოდ, მისი პარტიის ბიუჯეტი ჯერ კიდევ ჩამორჩება რუსეთის “ედინაია რასიას” თუ ამერიკის “დემოკრატიული პარტიის” დაფინანსებას, ამიტომაც უწევთ ხან “მარიამის ღრმულში” (©ქემოკლიძე), ხან “შავ ხვრელებში” (©დეკანოიძე) დამატებითი “მარგალიტების” ძიება.
რაქვიაშვილმა თავის “არიაში”, ფაქტობრივად, აღიარებითი ჩვენება მოგვცა: “დიახ, საერთაშორისო ფონდებისა და გრანტების მეშვეობით გვიწევს ჩვენი პოლიტიკური მოღვაწეობის დამატებითი კომერციალიზაცია, აბა, პამპერსებით ვაჭრობას დეპუტატს კანონი უკრძალავს, ხოლო პარტიების დაფინანსების მოქმედი წესი ჩვენთვის კოშმარულია”.
გვიახლოვდება იმ ეროვნული კანონის წინააღმდეგ გალაშქრებული კოლექტიური დემარშის წლისთავი, რომლითაც სწორედ რომ რაქვიაშვილის “არიის ლიბრეტო” უნდა გამოაშკარავებულიყო – მათ შორის, იმ ნაწილში, რომელიც ქართული პარტიების პირდაპირ საზღვარგარეთიდან დაფინანსების ფაქტებს გამჭვირვალეს გახდიდა.
თორემ საზღვარგარეთელი აგენტოკრატების საკრედიტო ბარათების პინ-კოდებზე მიბმული ჩვენი ოპოზიციონერების მხრიდან განსაკუთრებით თეატრალურად და დრამატულად ჟღერს მათი საკუთარ ამომრჩეველზე “პოლიტიკური წუხილი და ზრუნვა” მიგრაციაზე, უმუშევრობასა თუ არასაკმარის სოციალურ პაკეტებზე. გინდა, არ გინდა, ეგრევე პროლოგში მოყვანილი კომენტარი გაგახსენდება…“ – აღნიშნავს ქართველიშვილი.
