“ალბათ, უკვე ეს მესიჯი აქვთ: ვისაც გვინდა, ვაფინანსებინებთ თავს; რაშიც გვინდა, იმ მავნებლობაში ვიღებთ ფულს; ირიბი თუ პირდაპირი მუქარის შემცველ მესიჯებსაც გავახმოვანებთ და აბა, გაბედეთ და შეეხეთ ამ თემას. ყველა ასეთი მესიჯი არის დავალებით. მუქარის ტონის ირიბი შემცველობაც დავალებით არის. ამაში ფულს იხდიან. მედიაც ააქტუალურებს ამ თემას და ცოტა მიკვირს, რომ ამ კამპანიაში „ნაცმოძრაობის“ მედიაც გამოირჩევა, რაღაცნაირად ნიშნისმოგებით საუბრობენ ბოლო დღეებში – მათ შორის, პოლიტიკოსები – დაფინანსების თემაზე”, – განაცხადა საპარლამენტო უმრავლესობის ლიდერმა მამუკა მდინარაძემ სტრატეგიული ანალიზის ცენტრის დამფუძნებლის – ნოდარ ხარშილაძის განცხადების შეფასებისას, რომელმაც აღნიშნა: „ბიძინა ივანიშვილს ოპოზიციის ასეთი დაქუცმაცებით შანსი აქვს, რომ ამჯერადაც გადარჩეს”.
„ძალიან გასაკვირი და რთული ამოსაცნობი ტენდენციაა, ნიშნისმოგებით რატომ ააქტუალურებენ, ანუ “ვერ გაიტანეთ აგენტების შესახებ კანონი, შარშან ჩვენ რუსული დავარქვით და ახლა დაფინანსებაზე გეკითხებით და აბა, რას იზამთ?” – რაღაც ასეთი ფონი ჩანს. ანუ, შარშან ამერიკულ კანონს რუსული დაარქვეს, წელს კითხვა დავსვით ამასთან დაკავშირებით და ანტიამერიკული კამპანია დაარქვეს და ამ დროს, საქართველოს მოქალაქემ ჯერ კიდევ არ იცის და წარმოდგენა არ აქვს, რაში მიდის დაფინანსებები. ერთია კარგი მხარე – ჩვენ ვიცით, რომ მეგობარი და არამეგობარი ქვეყნებიდანაც, სხვათა შორის, გახსოვთ, რუბლებით დაფინანსების შემთხვევები და ა.შ. – დაფინანსება მიდის რაღაც მიმართულებით.
მეგობარი ქვეყნებიდან დაფინანსებები, რა თქმა უნდა, უამრავი კარგი და პოზიტიური მიმართულებით მიდის და კარგ საქმესაც ხმარდება გარკვეული თანხა, მაგრამ ჩვენ ამომწურავი ინფორმაცია, ის, რაც დამალულია (და დიდი პროცენტი დამალულია, რას ხმარდება), მათი ნიშნისმოგება და ასეთი ტონი, რომ დაფინანსებაზე ცოტა აგდებულად ლაპარაკობენ და ანტიამერიკული კამპანია დაარქვეს კითხვის დასმას…
დემოკრატიის ხარისხთან დაკავშირებით მსოფლიოში ყველაზე მეტი პრეტენზიები აქვთ ქვეყნებს და მათთან დაკავშირებულ თუ მათი დონორი ორგანიზაციების შესახებ დასმულ კითხვებს ანტიდასავლურ კამპანიას არქმევენ და ეს ნიშნისმოგების კამპანია ცოტა უცნაურად ჩანს. ალბათ, უკვე ეს მესიჯი აქვთ: აგერ, ჩვენ ვისაც გვინდა, ვაფინანსებინებთ თავს, მოქალაქეები აზრზე არ არიან; რაშიც გვინდა, იმ მავნებლობაში ვიღებთ ფულს, მერე ირიბი თუ პირდაპირი მუქარის შემცველ მესიჯებსაც გავახმოვანებთ და, აბა, ერთი, გაბედეთ და შეეხეთ ამ თემას. ლგბტ პროპაგანდის მხარდამჭერ სამდღიან სემინარს დავაფინანსებთ და აბა, გაბედეთ და მოიკითხეთ, საიდან დაფინანსდა. თვითონ თქვეს, დააფინანსა გაერო-ს განვითარების ფონდმა და ეს იყო ანტირუსული კამპანიის დაფინანსებაო. გაერო-ს განვითარების ფონდმა სხვა რამე თქვა, – უფლებებს ეხებოდაო. სინამდვილეში, ჟურნალისტებისგან წინასწარი ინფორმაცია მესამე ვერსიასთან იყო დაკავშირებული, – რომ შეეხებოდა ლგბტ პროპაგანდის მხარდაჭერას და მათი მესიჯია: აბა, გაბედეთ და იკითხეთ, საიდან ფინანსდება ლგბტ პროპაგანდის მხარდაჭერა.
ძალიან საშიშ თამაშში შემოდიან. მე ყველას ვაფრთხილებ – ნუ შემოდიან ასეთ თამაშში, იმიტომ, რომ ქართველი ხალხი ისე კარგად განსჯის ყველაფერს, რომ არ დასჭირდება ამას პარლამენტში პოლემიკა და თავის შედეგებს, მათ შორის, არჩევნებზე მიიღებენ ამასთან დაკავშირებით”, – განაცხადა მამუკა მდინარაძემ.
