„ჩვენ ველით საკონსტიტუციო სასამართლოში განხილვებს და იმედი გვაქვს, რომ საკონსტიტუციო სასამართლო მიიღებს გადაწყვეტილებას მათი არაკონსტიტუციურად გამოცხადების შესახებ“, – განაცხადა პარლამენტის თავმჯდომარე შალვა პაპუაშვილმა მიხეილ სააკაშვილის მხრიდან ოპოზიციური ალიანსის კრიტიკასთან და ოპოზიციაში შიდა დაპირისპირებასთან დაკავშირებით.
„ესენი არაკონსტიტუციური პარტიები არიან, რომლებსაც აქეზებენ გარედან. ვხედავთ, ესენი არიან 9 მაისის ევროპის დღის პარტიები. ეს ის ხალხია, რომელიც 9 მაისს აღნიშნავს არა ფაშიზმის დამარცხებას, 9 მაისს ულოცავენ არა ქართველ ვეტერანებს, რომლებმაც დღევანდელი ევროკავშირი შესაძლებელი გახადეს; 9 მაისს იხსენებენ არა იმ 300 000 ქართველს, რომელმაც სიცოცხლე დადო იმისთვის, რომ სამყარო და ევროპა გაეთავისუფლებინა ფაშიზმისგან, არამედ 9 მაისს კოქტეილით აღნიშნავენ ევროკავშირის თუ სხვა ელჩებთან, უცხოელებთან ერთად, რომლებიც არიან მათი დამკვეთები საქართველოში არეულობის, ზიზღისა და პროპაგანდის საწარმოებლად“, – განაცხადა პარლამენტის თავმჯდომარემ.
