„თავად ალეკო ელისაშვილი ამბობს, რომ ჩაიდინა დანაშაული და თქვენ არ გჯერათ?! – ასე მიმართა საქართველოს პარლამენტის თავმჯდომარემ შალვა პაპუაშვილმა ჟურნალისტს, რომელმაც აღნიშნა, რომ ვიდეოკადრებში არსებული პირი იდენტიფიცირებული არ არის. საუბარია კადრებზე, რომელიც საქმეში მტკიცებულების სახით დევს და სადაც ჩანს, როგორ ცდილობს ალეკო ელისაშვილი საქალაქო სასამართლოში ცეცხლის წაკიდებას.
შალვა პაპუაშვილის თქმით, თავად ალეკო ელისაშვილმა აღიარა, რომ გაცილებით მძიმე დანაშაულის ჩადენას გეგმავდა.
„კვალიფიკაციასა და დანაშაულს ადგენს სასამართლო. სასამართლო ჩატარდა, ყველა მტკიცებულება იქნა წარდგენილი და განაჩენი იქნა გამოტანილი.
ყველამ ჩვენი თვალით, პირდაპირ ეთერში ვიხილეთ, რაც მოხდა. ძალადობრივი ქმედება არის ტერორიზმი თუ სხვა ტიპის დანაშაული, აქ მთავარი განმასხვავებელი არის მათ შორის მოტივი. მოტივზე თავად ელისაშვილმა ილაპარაკა. ილაპარაკა, როგორ გეგმავდა თავდაპირველად, რომ ეყიდა ავტომატები, დახვედროდა მოსამართლესა და პროკურორს და დაეცხრილა. სიტყვასიტყვით ეს თქვა. ყველა ტერორისტი ამას ამბობს – რომ უსამართლობას ებრძვის. ყველა ტერორისტი ამას ამბობს, ვინც ქალებს, ბავშვებს კლავს, ვინც მანქანებსა და შენობებს აფეთქებს. ყველა ტერორისტი ამბობს, რომ სამართლიანობისთვის იბრძვის“, – განაცხადა შალვა პაპუაშვილმა.
