“ჩვენ მოვახერხეთ, კრიზისების, ომებისა და პანდემიის დროს 4,6%-ზე გავჩერებულიყავით. რა თქმა უნდა, ეს 4,6% – ყოველწლიური საშუალო ინფლაციური მაჩვენებელიც მაღალია და გაჭირვებულ ადამიანებს (და არა მხოლოდ მათ) ურტყამს ჯიბეზე, მაგრამ ეს არის რეალობა, რისი მოხერხებაც „ქართულმა ოცნებამ“, საბედნიეროდ, შეძლო და უფრო მეტად არ წავიდა ფასების ინფლაცია”, – განაცხადა საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა მამუკა მდინარაძემ.
როგორც მდინარაძემ აღნიშნა, ოპოზიცია ცდილობს, ინფლაციის თემით ლგბტ პროპაგანდის წინააღმდეგ მათი სიჩუმე გადაფაროს.
“მტკიცებულებების დონეზეა დადასტურებული – ლგბტ პროპაგანდის წინააღმდეგ ხმა რომ ვერ ამოვაღებინეთ, ეს არის ამის გადაფარვის მცდელობა.
გუშინ მოვიტანეთ ერთი ინდიკატორი, თქვენ მოიმარჯვეთ კალკულატორები და ნახეთ, რომ ყველაზე უხეში დათვლითაც კი, ინფლაციებს შორის 2,5 % იყო სხვაობა, ოღონდ, კლასიკური გაგებით თუ დავთვლით. უკვე მსოფლიო ბანკსაც, IMF-საც, საქართველოს სტატისტიკის დეპარტამენტსაც გამოქვეყნებული აქვთ და 6,6 იყო მათ დროს საშუალო ყოველწლიური ინფლაციის მაჩვენებელი; 4,6 არის ჩვენს დროს. განსაკუთრებით მნიშვნელოვანია იმის ხაზგასმა, რომ ჩვენს დროს იყო ორი კრიზისი, არის ორი ძალიან მასშტაბური, დამანგრეველი ომი რეგიონში და 2-3 წლიანი პანდემია. ამის ფონზე, ჩვენ 2%-ით ნაკლები ინფლაცია გვაქვს.
კიდევ ერთი ახალი მაჩვენებელი – რადგან თავისას არ იშლიან და ამ თემით სპეკულირებას და გაჭირვებული ხალხის მოტყუებას აგრძელებენ: რეგიონში საქართველო, მსოფლიო ბანკის მონაცემებით, ინფლაციის ანუ ფასების ზრდის სიმცირით მეორე ადგილზეა. ეს არის რეალური ციფრები და მაჩვენებელი.
რა თქმა უნდა, ყოველთვის მოახერხებ ისეთი შეჭირვებული ადამიანისა და ოჯახების პოვნას, რომელიც შეიძლება გაღიზიანდეს კიდეც ამ ციფრებთან დაკავშირებით, იმიტომ, რომ გაჭირვებულ ადამიანს ციფრი არ აინტერესებს, აინტერესებს მისი კეთილდღეობა და ის, რომ მაცივარი იყოს სავსე. ამით სპეკულირებენ და ამ ადამიანებზე ცდილობენ ზეგავლენის იმგვარად მოხდენას, რაც რეალური ციფრებიდან არ გამომდინარეობს. საქართველომ მოახერხა, რომ რეგიონში ინფლაციის სიმცირით ყოფილიყო მეორე ადგილზე, 2012 წლის შემდეგ საშუალო მონაცემებს თუ ავიღებთ, ეს არის. 4,6% და 6,6% – ეს არის განსხვავება ჩვენსა და “ნაცების” ფასების ინფლაციებს შორის”, – განაცხადა მდინარაძემ.
