“იმ ცალკეულ ინციდენტებს, რომლებიც აქციებზე ვიხილეთ, სახელმწიფო სათანადოდ გამოიძიებს. ეს არის ჩვენი სახელმწიფოს მიდგომა – რომ კანონის უზენაესობა ყველას მიმართ უნდა მოქმედებდეს. შესაბამისად, ამის შედეგებიც ვნახეთ”, – განაცხადა პარლამენტის თავმჯდომარე შალვა პაპუაშვილმა.
ჟურნალისტის კითხვაზე – რას უპასუხებს ოპონენტების კრიტიკას, რომ თუ იყვნენ იდენტიფიცირებულები აქციაზე მოძალადე სამართალდამცველები, აქამდე რატომ არ დააკავეს და რატომ ელოდებოდნენ ჟურნალისტურ გამოძიებას, პაპუაშვილმა უპასუხა:
„გამოძიება მიდიოდა, პროკურატურა საუბრობდა იმ სირთულეებზე, რომელიც ამ გამოძიებაში იყო. რა მომენტშიც პროკურატურამ ჩათვალა, რომ მყარი იყო საკუთარ მტკიცებულებებში, შესაბამისი ნაბიჯები გადაიდგა იმისთვის, რომ გამოვლენილიყვნენ ისინი, ვინც უფლებამოსილების გადამეტებით მოქმედებდნენ.
ამავე დროს, ჩვენ არ უნდა დაგვავიწყდეს, რასთან გვქონდა საქმე. ძირითადად, ეს ეხება 2024 წლის დეკემბერში მომხდარ ფაქტებს და ჩვენ უნდა გავიხსენოთ, უპირველეს ყოვლისა, რა გარემოება იყო. გარემოება იყო, რომ საქართველოში დაგეგმეს და დაიწყეს „მაიდნის“ განხორციელება.
თქვენ გახსოვთ, რომ საქართველოში ჩამოვიდნენ ევროკავშირის წევრი 7 ქვეყნის პარლამენტების წევრები, რომელთაგანაც გვესმოდა პირდაპირი მოწოდებები ხელისუფლების წინააღმდეგ. გახსოვთ, შვედეთის პარლამენტის კომიტეტის თავმჯდომარემ პირდაპირ „მაიდნისკენ“ მოუწოდა აგრესიულ ოპოზიციას.
ჩვენ ვნახეთ თავდასხმა საქართველოს პარლამენტზე, მცდელობა პარლამენტის გადაწვისა, ძალადობა, პოლიციელებზე თავდასხმა. იცით, რომ რამდენიმე პირი პასუხისგებაში არის მიცემული იმის გამო, რომ აზიანებდა ადამიანებს “მოლოტოვის კოქტეილით”. პოლიციელების ცოცხლად დაწვა უნდოდა. ამ პირობებში უწევდათ პოლიციელებს ჩვენი ქვეყნის დაცვა.
მინდა, კიდევ ერთხელ, მადლობა გადავუხადო თითოეულ პოლიციელს, რომლებიც იმ დღეებში იცავდნენ საკუთარ ქვეყანას „მაიდნისგან“, ძალადობისგან და თავდასხმებისგან, რომელიც სრულად გარედან იყო ორგანიზებული, წაქეზებული.
ამავე დროს, რა თქმა უნდა, ქვეყნის დაცვა გულისხმობს ასევე უმაღლეს პასუხისმგებლობას და მნიშვნელოვანია, რომ ამ პროცესში არ მოხდეს უფლებამოსილების გადამეტება.
ამ მხრივაც, ყველა ინციდენტს, რომელიც მაშინ ვიხილეთ, სახელმწიფო სათანადოდ მიჰყვება და გამოიკვლევს და გამოავლენს,
რაც მოხდა კიდეც.
ეს არის მიდგომა ჩვენი სახელმწიფოსი – რომ კანონის უზენაესობა უნდა მოქმედებდეს ყველას მიმართ, შესაბამისად, ვნახეთ ამის შედეგებიც“.
ცნობისთვის: პროკურატურამ 2024 წელს მიმდინარე აქციების დროს ზვიად მაისაშვილის, ლევან ხაბეიშვილისა და გურამ როგავას მიმართ განხორციელებული ძალადობის ფაქტებზე 5 პირი დააკავა.
