გია აბაშიძე ევროკავშირის მიერ რუსული კომპანიის სანქციების სიიდან ამოღების შესახებ: “ასეთი პოლიტიკა პრინციპულობის დემონსტრირება აღარ არის. ეს არის წესების სისტემა, სადაც „სანქცია“ სხვისთვისაა, „გამონაკლისი“ – საკუთარი თავისთვის”
ანალიტიკოსი გია აბაშიძე მედიაში გავრცელებულ ინფორმაციას ეხმაურება, რომლის მიხედვით, ევროკავშირმა, ესტონეთის მოთხოვნით, რუსული კომპანია სანქციების სიიდან ამოიღო.
„სულ ახლახან, საფრანგეთის მოთხოვნით, სანქციებიდან ამოიღეს რუსი მილიარდერი ალიშერ უსმანოვი — მეტალურგიის, სამთო-მოპოვების, ტელეკომუნიკაციებისა და ტექნოლოგიების ბიზნესმენი; სლოვაკეთის მოთხოვნით კი სანქციები აღარ გაუგრძელდა „ალფა – ბანკის“ თანადამფუძნებელ მიხაილ ფრიდმანს, რომლის მოხსნასაც ლუქსემბურგიც ითხოვდა.
ახლა კი, ესტონეთის [კაია კალასის სამშობლო] მოთხოვნით, ახალი სანქციების პაკეტიდან ამოიღეს რუსული კომპანია და მასთან დაკავშირებული პირი.
კომპანია სტრატეგიულ ნედლეულს აწვდის ესტონურ NPM Silmet-ს, რომელიც იშვიათმიწა მასალებს ამუშავებს და მის პროდუქციას ევროპული ელექტრომობილების, ქარის ტურბინების, ელექტრონიკის, საავტომობილო და საავიაციო ინდუსტრიები იყენებენ.
ასეთი პოლიტიკა პრინციპულობის დემონსტრირება აღარ არის. ეს არის წესების სისტემა, სადაც „სანქცია“ სხვისთვისაა, „გამონაკლისი“ — საკუთარი თავისთვის. და როცა წესების დამწერი მათივე პირველივე შესაძლებლობაზე გვერდს უვლის, ყველაზე ხმამაღლა სწორედ მისი მორალური ავტორიტეტის სიცარიელე ისმის”, – წერს აბაშიძე.
