თორნიკე ჭეიშვილი ოპოზიციის შესახებ: „სიამაყით საუბრობენ 2003-2012 წლებზე და იმ დანაშაულებს, ფაქტობრივად, ხდიან საქილიკოდ – ხელს აწერენ იმას, რომ “ნაცობა” არის იდეოლოგიურად უკურნებელი სენი და გამოწვევა, რომელსაც ერთადერთი სამართლებრივი პასუხი შეიძლება გაეცეს და სწორედ ამ პროცესში ვარ ჩვენ ახლა“
„იმის გათვალისწინებით, რომ ეს არის არსებითად ერთიანი ძალა – კოლექტიური “ნაცმოძრაობა” და მისი განშტოებები, განსხვავებული მოლოდინი არ შეიძლება არსებობდეს, თუნდაც, დღევანდელ დღესთან მიმართებით, ვინაიდან ის, რაც საზოგადოებამ იხილა მათი მხრიდან გუშინწინ, რაც იხილა გუშინ, რაც წარმოადგენდა თავის მხრივ, როგორც დემაგოგიის, ისე იურიდიული პროფანაციის ძალიან თვალსაჩინო მაგალითს, სავარაუდოდ, დღესაც გაგრძელდება“, – განაცხადა საპარლამენტო უმრავლესობის წევრმა თორნიკე ჭეიშვილმა საკონსტიტუციო სასამართლოს სხდომის დაწყებამდე.
“ისინი ვერ ხვდებიან, რომ კიდევ ერთხელ ძალიან დიდ შეურაცხყოფას აყენებენ ჩვენს საზოგადოებას მათ მიერ ტირაჟირებული ნარატივით. კერძოდ, როდესაც ისინი გამოდიან და სიამაყით საუბრობენ, თუნდაც, 2003-2012 წლებზე და იმ დანაშაულებს, ფაქტობრივად, ხდიან საქილიკოდ, აბუჩად იგდებენ კონკრეტულ ტრაგიკულ ისტორიებს, ეს არის გაუმართლებელი და აბსოლუტურად ამორალური მიდგომა შესაბამისი პირებისადმი, იმ ადამიანებისადმი, რომლებმაც საკუთარ თავზე გადაიტანეს და პირადად გახდნენ იმ სისასტიკის მსხვერპლი, რომელიც უკავშირდებოდა “ნაცმოძრაობის” ამ სადისტურ რეჟიმს.
აქედან გამომდინარე, ცეცხლზე ნავთს ასხამენ, ფაქტობრივად, და ხელს აწერენ იმას, რომ “ნაცობა”, როგორც ასეთი, არის იდეოლოგიურად აბსოლუტურად უკურნებელი სენი და გამოწვევა, რომელსაც ერთადერთი სამართლებრივი პასუხი შეიძლება გაეცეს და, სწორედ ამ პროცესში ვარ ჩვენ ახლა შესულები.
ეს არის ის შემთხვევა, როდესაც არსებობს მკაფიო, აშკარა და ძალიან რეალური მტკიცებულებებიც, მიზნებიც და მათგან მომდინარე საფრთხეებიც, რომელიც კარგს არაფერს უქადის საქართველოძი კონსტიტუციურ წყობილებას, კონსტიტუციურ წესრიგს და ჩვენი პასუხისმგებლობა არის ის, რომ ამ ყველაფერს დავუპირისპიროთ შესაბამისი პროცედურული ბერკეტები, შესაბამისი არგუმენტები, რომელიც, რა თქმა უნდა, არის ჩვენს სარჩელში მოცემული და უკვე მომდევნო ეტაპებზე, როდესაც იქნება პაექრობის შესაძლებლობა, იქნება შესაბამისი დასკვნითი სიტყვა, შეჯამების შესაძლებლობა, რასაკვირველია, ჩვენ, კიდევ ერთხელ, საზოგადოებას ძალიან მწყობრად წარვუდგენთ, მათ შორის, აი, ამ პროცესის კვალდაკვალ მათი მხრიდან გამოვლენილ სხვადასხვა არაკონსტიტუციურ მისწრაფებას, შესაბამის მაგალითებს.
ამ ფონზე, შეუძლებელია, კითხვის ნიშანი არსებობდეს იმასთან დაკავშირებით, ზოგადად ეს კოლექტიური, ერთიანი პოლიტიკური ეგრეთ წოდებული პარტია, კოლექტიური “ნაცმოძრაობა” უნდა დარჩეს თუ არა ჩვენს პოლიტიკურ სპექტრში. რა თქმა უნდა, ამ შემთხვევაში პასუხი არის ერთმნიშვნელოვნად არა, იმიტომ, რომ ამაზე უფრო მკაფიო დემონსტრირება იმისა, რასაც ჰქვია კონსტიტუციური წყობილების წინააღმდეგ წასვლა, რასაც ჰქვია ქვეყნის დამოუკიდებლობის ხელყოფა, რასაც ჰქვია საფრთხეების შექმნა ტერიტორიული მთლიანობისთვის, უბრალოდ, არ შეიძლება იძებნებოდეს“, – განაცხადა თორნიკე ჭეიშვილმა.
