ვარლამ ლიპარტელიანი: „ყველა სპორტსმენის სახელით, მინდა მხარდაჭერა გამოვუცხადო მერაბ დვალიშვილს. რაც შეეხება ფაქტს, ამორალური საქციელი იყო, რომელიც არც ადამიანურში, არც სპორტულში არ ჯდება და არანაირი გამართლება არ აქვს“

„ყველა სპორტსმენის სახელით, მინდა მხარდაჭერა გამოვუცხადო მერაბ დვალიშვილს“, – განაცხადა „ქართული ოცნების“ ახალგაზრდული ორგანიზაციის თავმჯდომარე ვარლამ ლიპარტელიანმა აბუ-დაბიში მომხდარი ფაქტის კომენტირებისას.

„უშუალოდ ფაქტს რაც შეეხება, იყო ამორალური საქციელი – საქციელი, რომელიც არც ადამიანურში, არც სპორტულში არ ჯდება და არანაირი გამართლება არ აქვს. მე ვიტყოდი, რომ იმ სპორტსმენებმა თავიანთი სახე აჩვენეს, ვინც მერაბთან და იმ ახალგაზრდა ბიჭთან მივიდნენ. მინდა, წარმატებები და ჯანმრთელობა ვუსურვო მათ“, – განაცხადა ლიპარტელიანმა.

როგორც ცნობილია, აბუ-დაბიში, სადაც RAF-ის მორიგი ეტაპი უნდა გაიმართოს, მერაბ დვალიშვილს სასტუმროში, უკნიდან მიპარვით, UFC-ის მებრძოლები, ძმები ნურმაგომედოვები და მათი თანმხლები პირები თავს დაესხნენ.